Сте се запрашале кој е најпродаван автомобил во нашава земја? Обично овие информации ги гледаме за големите странски пазари, како Германија или САД, рецимо. Но, сега знаеме кој модел земал прво место за продадени единици минатата година. Информациите ни ги принесуваат Фелипе Муњоз од Car Industry Analysis на Инстаграм и Пал од веб порталот CE Auto.
Видовте во насловот, но најпродаваниот модел минатата година во државата бил Kia Sportage. Изненадени сте? Веројатно не.
Во текот на 2024 година Kia успеале да продадат 280 примероци од познатиот SUV. Во изолација, тоа се чини како многу мала бројка, но за толку мал пазар со прилично мала куповна моќ, тоа е навистина фантастична бројка. Го тестирав Sportage малку пооддамна, и можам да кажам дека тоа е заслужено.
На второ место со 271 продадени примероци е Skoda Octavia. Пак ќе ве прашам, изненадени сте? Јасно е зошто гледаме по десет секој ден по скопските улици. Апсолутно и дефинитивно заслужен успех и за Octavia, како што дознав кога ја тестирав пред некое време.
Кога сме кај Skoda, вреди да се спомне дека три од десетте најпродавани модели на нашиов пазар ни доаѓаат од Чешка. Малиот Kamiq e одма позади Octavia на трето место со 246 примероци, додека Scala е на деветто место со 209 примероци продадени минатата година.
На четврто место е Toyota Corolla со 221 примерок, на петто место е Opel Corsa со 219 примероци, на шесто Dacia Duster исто со 219, и Citroen C3 на седмо со 216 примероци.
Hyundai Tucson, кој има многу заедничко со Sportage, малце ме зачуди што е на осмо место со 214 примероци. Десеттото и последно место го зема Renault Clio со 196 продадени примероци во 2024 година.
Навистина интересна статистика. Секогаш се прашувам што е тоа што купуваат македонците всушност, и можам да кажам дека сите овие модели се многу добри избори. Потврдувам за тие кои ги имам возено, а и за тие кои не сум ги возел сигурен сум дека не погрешиле купувачите.
Честитки до Kia Sportage за првото место :) Сигурно сте сега љубопитни зошто е толку популарен? Елате навака да го прочитате тестот за Sportage Hybrid.
А да, и секоја чест до Фелипе и Пал за овие информации. Ако ви се интересни вакви статистики и сакате да видите што коли се купуваат ширум светот, удрете follow на Car Industry Analysis на Инстаграм.
