Во 2020 година, на првиот дигитален (од очигледни причини) Саем за автомобили во Женева, бунтовничкиот шведски бренд Koenigsegg го претстави својот прв семеен автомобил, односно мегаавтомобил, Gemera.
Прототипот имаше простор за четворица патници, и иновативен плаг-ин хибриден погон со три електромотори и три-цилиндрец со околу 600 коњски сили, а вкупниот износ беше 2,000 коњски сили.
Три години подоцна, Koenigsegg конечно ни ја претставува сериската изведба на Gemera. За жал, имаме мали промени во погонскиот систем... 5.0-литарски V8 и вкупен износ од 2,300 коњски сили!
Убаво прочитавте. Gemera која ќе се испорачува до 300те среќни купувачи ќе биде достапна и со V8 агрегатот од Jesko, односно HV8 (hot V8), поради поставеноста на турбините во внатрешноста на главите.
Претходната претпоставка беше дека нема доволно простор во Gemera за V8 мотор, но поради иновативната Light Speed Tourbillon трансмисија, која не користи потисна плоча, сега е возможно. Оваа трансмисија ја заменува Koenigsegg Direct Drive, која имаше само еден степен на пренос и за прв пат ја видовме на Regera.
Инаку, Gemera ќе се нуди и со моќниот трицилиндрец, кој Koenigsegg го нарекуваат Tiny Friendly Giant (мал дружељубив џин), поради својот релативно мал капацитет а огромна силина. Иако има само два литри капацитет, само моторот испорачува 600 коњски сили.
Наместо три електромотори, сериската Gemera ќе користи само еден електромотор наречен Dark Matter (темна маса), кој е иновативна комбинација од радијален и аксијален електромотор. Сам по себе, електромоторот испорачува 789 коњски сили и тежи само 39 килограми!
Инаку, дизајнот на Gemera претрпи неколку ситни промени. Сега е поставена на нови алуминиумски фелни со Y краци и механизам за централно заклучување, на конкретниов модел обоени во прекрасна златна боја. Имам само пофалби и за зелената боја на каросерија, која одлично се спарува со светло кафеавиот ентериер.
Вкупниот системски износ на Gemera со HV8 моторот на внатрешно согорување изнесува 2,300 коњски сили и 2,750 Nm вртежен момент. Таа бројка на вртежен момент не е далеку од многу камиони што се нудат на пазарот денес.
Поради релативно ниската тежина, Gemera произведува 1.11 коњски сили за секој килограм од својата тежина. Тоа значи, според Koenigsegg, ова не е суперавтомобил, и не е хиперавтомобил: ова е мегаавтомобил.
И сѐ тоа пред да го спомнеме пиес де резистанс на Gemera: има четири седишта и доволно простор за четворица патници, без разлика дали се деца и возрасни! Дури има и доволно простор за багажот на сите, и задните седишта добиваат копија на инфозабавниот систем од предниот дел на ентериерот, како и задна климатска зона.
Како што велат од Koenigsegg, ова е првиот нивен мегаавтомобил кој овозоможува искуството да биде споделено со семејството и пријателите.
Само 300 примероци од Gemera ќе бидат произведени, почнувајќи од 2025 година, во новиот производен капацитет на Koenigsegg наречен Gripen Atelier.
Капацитетот е додаток на базата на Koenigsegg во Ангелхолм, Шведска, кој зафаќа 11,000 метри квадратни и ќе овозможи Gemera и другите идни модели на брендот да се произведуваат на најефикасен и најдобар начин. За цените уште нема информации, но сигурно е дека се работи за седум цифри.
