Знам дека за многу од вас јапонски спортски автомобил е врвот, и тоа е апсолутно оправдано. Toyota нѐ изненади сите пред неколку години кога ја оживеа Supra, модел кој се покажа одлично и стана подобар со тек на време.
За жал, Supra наскоро ќе нѐ напушти. Но, тоа не значи дека тука ќе се стави точка. Муабетот од далечниот исток иде дека Toyota и Mazda соработуваат за нови спортски автомобили со погон на задните тркала.
Првата гласина од Јапонија, според неименуван извор кој разговараше со јапонскиот портал Best Car (пренесено од Drive Австралија) е дека Mazda повторно се двоумат дали нивниот спортски автомобил да го користи Ванкел моторот. Стварно ми е жал за Mazda, луѓе, никако не можат да се одлучат за ова, и тоа веќе добри 10 години.
RX Vision концептот на Mazda од 2015
Mazda
Шала на страна, најновата идеја на Mazda е да го баталат Ванкелот и на негово место да дојде 3.3 турбо бензинецот со шест цилиндри моментално достапен во големите CX-60, CX-80, а и CX-90 и CX-70 кај америте. Ова има многу смисла, и од тоа што сум видел, тој мотор нуди едно многу пријатно искуство. Замислете сеа тој мотор во полесна спортска кола со заден погон. Звучи добро, нели?
А што е работава со Toyota? Не знам дали знаете, но Toyota и Mazda имаат соработка долго време. Имаат заедничка фабрика во Алабама, Mazda 2 Hybrid е базирана на Toyota Yaris, а пред десетина години Mazda 2 се продаваше во Северна Америка под младелачкиот бренд Scion како Scion iA, па потоа како Yaris. Знам, збунувачки малце, ама тоа се само неколку примери за долгогодишното партнерството помеѓу двата јапонски гиганти.
Toyota самите имаат кажано дека инвестицијата во нов спортски автомобил со мотор со шест цилиндри е многу скапа, така да има многу смисла да соработуваат не само со добро познат партнер, туку и некој кој веќе има спремен мотор со шест цилиндри.
Шон Хенли, шефот на маркетинг и продажба на Toyota во Австралија (според Drive) тврди дека Supra како модел нема да згасне, и веќе се работи на следната генерација.
Ова е многу паметна идеја, барем на хартија. Сите страни добиваат, никој не губи. Toyota си добива нова Supra, Mazda конечно добива нов RX модел, и двата со одлични мотори, и сигурен сум дека ќе изгледаат и ќе возат баш како што треба. Само не знам дали ќе пројде RX името со фановите доколку нема Ванкел мотор. За нас европјаните исто е битна работа омразата кон многу спортски автомобили од страна на законодавците…
