Јапонскиот бренд Honda пред неколку месеци најави концепт за електричен спортски автомобил кој ќе го претстават на саемот за автомобили во Токио. Повеќето од нас веднаш скокнавме до претпоставката дека ќе видиме нова генерација S2000 или NSX.
Тие претпоставки биле погрешни, бидејќи Honda се одлучи да оживее еден доста потценет модел од своето историско портфолио како електричен концепт: Prelude.
Дизајнот на овој концепт е модерна интерпретација на Prelude моделот со кој светот се поздрави за последен пат во 2001 година. Во исто време, целиот дизајн е малку поразличен од она што сме го виделе од Honda досега.
И покрај тоа што ова е концепт автомобил, изгледа како да е спремен да влезе во производство, и за среќа, токму тоа и ќе се случи. Honda се посветени да ги заддржат спортските автомобили во понудата и по електричната транзиција, и Prelude ќе пристигне пред крајот на оваа деценија.
Honda се исто така посветени нивните електрични автомобили да бидат забавни за возење, но за жал, не се заинтересирани за симулиран мануелен менувач или симулиран автоматски со мануелен режим. Велат дека работат на други методи и начини за возачите на Honda EVs да бидат насмеани зад воланот.
Prelude Concept ќе биде изложен на саемот за автомобили во Токио заедно со Prologue, електричниот SUV базиран на Ultium архитектурата на General Motors, наменет во главно за америчкиот пазар.
