Мислам дека на сите ви е веќе јасно дека европската авто индустрија систематски пробува да елиминира сѐ што е хот хеч и сите видови performance возила кои не се суперавтомобили или нешто такво. Сега, имаме уште еден модел да додадеме на тој список на легенди кои отишле во историјата.
Нели вчера се појави оваа генерација на Honda Civic Type R? Знам, и јас имам такво чувство, ама еве, веќе дојде време да си оди. После 28 години од моделот во Европа, Honda претстави лимитирана серија на Civic Type R нареченa Ultimate Edition, и ќе бидат произведени само 40 примероци.
2026 година ќе биде официјалниот крај на Civic Type R во Европа, а со тоа останува само регуларниот Civic Hybrid. Ultimate Edition доаѓа во познатата Championship White бела боја, и додава неколку ситни црвени детали, да се знае дека се работи за нешто посебно.
Ентериерот добива карбонски детали и дополнително осветлување на некои елементи. Honda ќе вклучи и мала кутија со подароци, меѓу кои и плакета со сериски број, покривка (позната и под името церада), и карбонски привезок за клучеви.
Нема особени промени во моторот или општиот погонски систем, сѐуште е 2.0 турбо бензинец со 329 коњски сили, кои одат до предните тркала преку (и само преку) 6-степен мануелец.
Четириесетте примероци на Civic Type R Ultimate Edition нема да бидат со резервација, туку на принципот кој прв дојде. Не знам дали македонскиов пазар ќе добие слот за Ultimate Edition, ама веројатно ќе биде само еден. После Ultimate Edition, тоа е тоа, нема веќе Type R во Европа воопшто.
Како мало потсетување, првиот Civic Type R кој го добија повеќето европјани беше EP3 генерацијата, со коцкастиот дизајн и менувачот поставен високо, а да не го спомнувам атмосферскиот бензинец со VTEC кој вртеше до 8.000 rpm.
Можеби очекувавте, но Civic Type R заминува од европскиот пазар поради новите регулативи за емисии на штетни гасови на унијата, кои тековниот Civic Type R не ги исполнува. Само пар дена пред ова, и Ford го укина Focus ST, неколку месеци пред официјално да заврши Focus целосно во Европа.
Не знам дали ќе останеме со вистински хот хеч модели како Civic Type R во блиска иднина. Сѐ оди на електрични хот хечови и ултра хечови со преку 300 коњи и погон на сите тркала. Такви се регулативите какви се, ни мене не ми се допаѓаат (колку и да разбирам зошто постојат и зошто се строги), ама апсолутно постои варијанта за некаков компромис или вразумување.
Со оглед на тоа дека Stellantis го вратија HEMI V8 моторот во RAM пикапите (a ексдиректорот Таварес уште немаше ни врата затворено на излегување), и цела индустрија сепак се реши за хибриди наместо целосна ЕВ транзиција, ова не мора да значи дека е крајот засекогаш.
А да, кога сме кај тоа, хибридниот Prelude ќе се нуди во Европа, и ако добро го изиграат тоа, може да биде една добра утешна награда. Сега за сега, не ми останува ништо друго освен да кажам збогум на Honda Civic Type R.
