Мислам дека никој од нас не е изненаден. Првобитниот план за новиот Fiat 600 беше да биде целосно електричен, но пазарот издиктира дека треба да има и хибрид. Сега, за тие што не сакаат никаква електрификација, има уште едно решение.
Кажете имево. Кратко и јасно. Нема електромотор, нема батерија, само мал турбо бензинец. Оваа комбинација на погон е достапна веќе подолго време во Jeep Avenger, кој е братучед на Fiat 600, а сигурно со тек на време ќе го видиме и кај Grande Panda.
Вреди да се спомне дека не се работи за PureTech мотор. Fiat 600 Petrol го користи новиот Turbo 100 бензинец, кој е де факто замена за 1.2 PureTech моторот со 100 коњи. Turbo 100 е исто 1.2 и исто има 100 коњи, но речиси сè друго е ново. Како што ви кажував, има ланец наместо wet belt, турбо со варијабилна геометрија, нов систем за директно вбризгување на гориво, а работи на Милер циклусот за подобра термална ефикасност.
Силата оди исклучиво до предните тркала, и тоа преку 6-степен мануелен менувач. Од тоа што успеав да видам, нема да се нуди автоматик со оваа изведба. Има смисла, и други брендови на Stellantis решија да ја поедностават понудата на овој начин, по готово кај моделите со CMP и Smart Car платформите (Fiat 600 е на CMP, а Grande Panda е на Smart Car).
Од надвор нема никакви разлики, со исклучок на единечниот издув на задниот браник; 600 Hybrid има двоен издув. Ентериерот е исто така речиси ист, со прилично многу карактер. Најголемата разлика е, секако, менувачот, кој се чини како да не зафаќа многу простор.
По повод лансирањето на 600 Petrol, Fiat исто претстави и Street верзија на 600. Можеби се сеќавате дека претходно имаше Street верзија на Tipo, ова е втор пат да видиме Fiat во ваква изведба.
600 Street доаѓа стандардно со двобојна каросерија со контрастен црн покрив, црни алуминиумски фелни, и разноразни црни акценти по каросеријата, додека внатре има малку поразличен дизајн на седишта, како и црна кугла за менувач (инаку е сребрена). Ова е launch верзија на 600 Petrol, и само 2.000 примероци ќе бидат произведени.
Иако ова беше очекувано, мислам дека е многу паметна одлука. Во вака непредвидлив пазар и со вакви непредвидливи околности, секогаш е добра идеја да се има опции за сите видови клиенти.
Плус, бидејќи нема никаква електрификација, 600 Petrol најверојатно ќе има пониска почетна цена, што ќе го направи уште попривлечен. Чист бензинец исто многу полесно проаѓа на пазари како нашиот, како што верувам дека знаете. Засега нема инфо кога би стигнал кај нас или колку би чинел, но Korrmotive ќе биде на терен штом дознаеме.
