Минатата година добивме новост од Stellantis дека се менува математиката за сите хибридни модели. Тоа што беше Hybrid 100 испадна дека има 110 коњи, а тоа што беше Hybrid 136 всушност има 145 коњи.
Сега, има нова математика и за плаг-ин хибридите, и првиот модел со оваа нова математика е Citroen C5 Aircross. Ајде да видиме.
Плаг-ин хибридната изведба на Citroen C5 Aircross досега нудеше 195 коњи, и таа беше бројката на сите брошури, ценовници итн. По ново, истиов погонски систем има 225 коњи. Сега сигурно се прашувате; појак електромотор можеби? Појачан е бензинскиот мотор? Не, ништо од тоа. Едноставно Stellantis реши да го пресметува максималниот износ од двата компоненти на погонскиот систем поразлично. Речиси сѐ друго си е исто.
Батеријата е сега 21 kWh, со 18 kWh нето капацитет. Тоа значи, меѓу другото, до 114(!) километри опсег на струја според WLTP. 0-100 за околу 8 секунди, и полнење со моќност до 7.4 kW.
Силата сѐуште оди до предните тркала, и сега за сега исклучиво предните, и понатаму преку 7-степен автоматик со двојна спојка. Промени во другите опции за погонски систем на C5 Aircross нема; самополнечкиот хибрид и понатаму има 145 коњи, додека целосно електричниот ë-C5 Aircross има 211 коњи.
Од Citroen додаваат дека една од причините зошто се менува оваа математика е Euro 7, новите регулативи бараат реални бројки кои покажуваат реални перформанси. Исто така, со полн резервоар и полна батерија, Citroen тврди дека C5 Aircross PHEV сега може да помине до 1.100 километри, што е навистина огромна бројка.
Како што кажав погоре, C5 Aircross е прв со оваа нова математика, но мислам дека и неговите братучеди – Opel Grandland, Peugeot 3008 и Jeep Compass – наскоро ќе бидат ажурирани со новите цифри, бидејќи сите го користат истиот плаг-ин хибриден систем и се базирани на истата платформа. Е сега останува на нас да шпекулираме дали STLA Medium роднините ќе бидат опфатени во неодамнешната одлука на Stellantis да ги врати дизелските мотори…
