Новитети

BMW ја претстави новата 3 Series

Марко Соколовски4 мин.До фотки
BMW

BMW 3 Series е со нас веќе 50 години, и мислам дека сите ќе се сложиме дека е едно од најлегендарните имиња, и еден од најлегендарните модели во автомобилската историја. Сега дојде време и за нова генерација која се придружува на Neue Klasse офанзивата на BMW, првично започната од електричниот iX3.

Веќе го видовме електричниот i3 на почетокот на годинава, а сега дојде и време и за моделите со мотори со внатрешно согорување. Има доста што да се каже, така да, да видиме.

Поздравете ја новата Тројка

BMW

3 Series, Серија 3, или како што си ја викаме ние народски, Тројка, официјално и целосно  влегува во својата осма генерација. BMW претстави неколку модели со бензински мотори, па ајде да видиме што има ново.

Прво, Neue Klasse дизајнот. Најголемата разлика помеѓу i3 и останатите модели е предницата, која има малку поагресивни отвори за ладење, и задниот дел каде што, секако, имаме вистински издуви. Интересен дизајн, и ми се допаѓа тоа што препознатливите предни маски не се повеќе огромни, но сепак оставам простор за кога ќе го видам дизајнов во живо.

BMW

Главниот фокус на оваа премиера е M350, црвениот модел на фотографииве. Како што наведува името, ова е најмоќната изведба на новото 3 Series, барем додека да пристигне M3. Под хаубата имаме 3.0 бензинец со турбо и шест цилиндри во линија. Да, и покрај турбуленциите во авто индустријата, BMW не се откажува од овој мотор, и има неколку нови иновации што му овозможија да ги исполнува критериумите за Euro 7 регулативите, а една од нив е лајт хибрид систем, секако. Има 443 коњи, стига до стотка за 4.1 секунда, и нормално доаѓа со погон на сите четири тркала. 

BMW

Другите две варијанти се 320 (сивиот на фотката) и 318, и двата го користат TwinPower 2.0 турбо бензинецот со четири цилиндри. Мала дигресија да расчистиме една работа, TwinPower не значи битурбо/две турбини. 320 има 211 коњи и стига до стотка за 7.4 секунди, додека 318 има 156 коњи и стига до стотка за 9.5 секунди. Сите варијанти доаѓаат по default со 8-степен автоматик. 

BMW

Верувам дека забележавте дека i ознаката, која кажуваше дека се работи за бензин, повеќе ја нема. Таа ознака е исклучиво за електричните модели, додека моделите со бензински мотори ќе ги имаат само бројките. Што се однесува до d ознаката, за неа нема потреба како и да е – дизел моторите воопшто нема да се дел од понудата.

Двете електрични варијанти кои се спомнуваат во соопштението се i3 40 xDrive и i3 50 xDrive, и двете со два електромотори и погон на сите четири тркала. i3 40 има 374 коњи и максимален досег од 710 км според WLTP, а i3 50 има 469 коњи и максимален досег до 912 км според WLTP(!!!). Има и понекоја фотка од врвната i3 M60 изведба, но засега нема многу информации за неа, освен што ќе биде електричен пандан на M350.

BMW

Нема да се изненадите дека ентериерот е во склад со другите модели од Neue Klasse. Панорамски екран наречен Panoramic Vision за најважните информации со возењето се простира ширум целата контролна табла, а во средината имаме невообичаено обликуван  17.9-инчен екран за најновата верзија на iDrive системот.

BMW

Сум видел верзија на ентериеров во живо, и дефинитивно е невообичаен, но голема е веројатноста дека ќе треба само навикнување. Достапни се три опции за волан, и секоја од нив ја има оваа невообичаена форма, стандардно за Neue Klasse. Безбедносни системи има еден куп, меѓу кои и Symbiotic Drive и Highway Assistant, кои ќе овозможат hands-free возење (без раце) на автопат во 21 држава.

Засега нема информации околу цените, и немаме инфо кога би пристигнал овој модел кај нас, но претпоставувам дека ќе биде на почетокот на 2027. Многу технологија, доста наметлив дизајн, а и тоа што не се откажаа туку така од бензинските мотори покажува дека BMW се доста сериозни со новата генерација 3er. Останува да видиме како ќе биде зад волан.

Ти се допадна?

Сподели
Сите написи заBMW

Повеќе новитети

Сите објави