Можеби се сеќавате на Bentley Continental Supersports, еден од врвните изведби на Bentley Continental GT кој се фокусираше на динамика и намалена тежина, сосема спротивното од регуларниот Continental GT.
Наскоро ќе стигне нова верзија на Supersports, со една многу голема промена.
Да, убаво прочитавте. Од почетокот на Continental GT па до денес, сите верзии имале погон на сите четири тркала, без разлика дали се специјални верзии или регуларни. Сега, новиот Continental Supersports, кој ќе го видиме на 13.11, ќе има погон на задните тркала.
Ова значи, меѓу другото, значително намалена тежина, што е една од фокусните точки на Supersports како и да е. Од Bentley ветуваат дека ова ќе биде најлесниот модел од современата Bentley ера. Да се разбереме, нема да биде пердув, но ќе биде далеку полесен од класичниот Continental GT. На фоткава се гледа и карбонски аеро додаток, претпоставувам дека ќе има многу од тие.
Моментално нема инфо околу моторот или силата, но како потсетување, Continental GT е достапен во две хибридни изведби, и двете спаруваат 4.0 V8 со две турбини. Едната варијанта има 671 коњи, додека другата има 782 коњи.
Со оглед на тоа како е позициониран Supersports, мислам дека можеме да очекуваме бројката да почнува со 8, а можеби и со 9. Засега нема инфо дали ќе биде хибрид и Supersports, но претпоставувам дека ќе биде. Нема смисла да го менуваат од корен, а W12 моторот повеќе не е достапен.
Повеќе инфо ќе дознаеме на 13 ноември. Не знам колку беше паметна одлуката да биде со заден погон во комбинација со таква сила, ама инженерите на Bentley знаат што прават, така да мислам дека можеме да им веруваме дека Supersports ќе биде како што треба зад волан.
На другите фотографии е прикажан регуларниот Continental GT.
