Уште оддамна слушнавме, и видовме преку концепт автомобил, дека Audi има друг план за суперавтомобил. Се поздравивме со R8 минатата година за последен пат, и малку беше во вис прашањето околу замената за овој модел.
Преку PB18 концептот, Audi ни покажа како отприлика би изгледал моделот што требаше да биде електрична замена за R8. Но сега, според гласини споделени од Autocar во Британија, плановите се менуваат.
Не знам за вас, но според мене ова се многу многу добри вести. Врапчето од Германија кажува дека Audi има план да го оживее R8 во 2027 година како директен пандан, или ко што викам јас, братучед на новиот Lamborghini Temerario.
Тоа во превод би значело нов суперавтомобил со турбо V8 и плаг-ин хибриден систем со некои 900 коњи и redline на 10,000 вртежи во минута. Така оди погонскиот систем во Temerario, а тој модел сам по себе ветува луди перформанси. Помалку од три секунди до стотка и 338 км/ч.
Според Autocar, не е работава само идеи и концепти, туку веќе сериозно се работи на проектот и, како што кажав погоре, се очекува да се појави во сериска изведба во 2027. Audi исто има сериозни планови да се врати во шампионати како Le Mans, и ќе има добра можност да го внесе новиот R8 во таа игра, а воедно и да го зголеми престижот од ново.
Засега не се познати други информации, освен тоа дека веројатно ќе се склопува во Булингер Хуфе во Германија, каде што биле склопувани и претходните генерации на R8. Autocar додава дека одлуката сепак да се оживее R8 со хибриден погон наместо со целосно електричен потекнува од одлуката на Audi да го продолжи векот на одредени модели со класични мотори, како и да ја прошири понудата на хибриди.
Ако барем малку личи на PB18 концептот (кој го гледате на фотографииве), или пак на новиот A6 Avant кој неоддамна беше претставен, ова е модел за кој вреди да се чека. Многу се надевам дека сево ова е вистина, и дека ќе видиме уште една генерација на Audi R8 со бензински мотор.
