Не знам дали сте во тек, но неоддамна Apple го претстави CarPlay Ultra. Слично како досегашниот Apple CarPlay, само што Ultra го заменува екранот пред возачот, и овозможува управување со повеќе функции на возилото, меѓу кои и клима уредот.
Звучи интересно вака навидум, и Aston Martin веднаш загриза; сите модели на британскиот бренд ќе добијат CarPlay Ultra со тек на време. Меѓутоа, некои од другите гиганти на индустријата баш и не се воодушевени.
И покрај тоа што беа најавени дека ќе го нудат CarPlay Ultra кога ќе биде спремен за време на Apple конгресот во 2022, Audi, Mercedes-Benz, Volvo, Polestar, Renault се одрекоа. Да наговестам, не се мисли целосно да се одречат од Apple CarPlay, мислам дека ќе се случат протести со запалени мотики доколку дојде до тоа, туку само Ultra изведбата нема да ја нудат. Jaguar Land Rover сѐуште се двоуми, додека Nissan и Infiniti не искоментираа ништо.
Работава баш и не изгледа како што Apple сигурно би сакале. Голем дел од брендовите кои се залагаа за нудење CarPlay Ultra сега викаат „пу, не важи.“
Има многу теории зошто дојде до оваа работа. Некои мислат е бидејќи, според инфо пренесено од колегите од Motor Trend, iPhone уредите не се баш среќни кога работат со CarPlay Ultra. Се загреваат за неколку минути, без разлика дали климата е вклучена или не, и им се троши батеријата иако се вклучени на полнач. А да, и инструмент таблата која доаѓа од CarPlay Ultra наводно малку кочела.
Како што кажав, многу дискусии има за зошто овие брендови се повлекоа од работава, ама јас ќе искористам прилика да аплицирам малку балканска, брутално искрена логика. Едноставно повеќето од овие брендови не сакаат да даваат толку контрола и толку пристап до податоци на Apple.
Можеби сте чуле дека General Motors, Rivian и Tesla не нудат Apple CarPlay воопшто, и тоа е само поради тоа што многу голем дел од податоците за возачите одат кај Apple, а брендовите сакаат да ги заддржат за себе со цел да ги подобрат своите возила, како и идните.
Така некако е и во овој случај, и плус, колку и нас да ни одговара поврзување со смартфон на новите возила, и колку и да се водат дискусии за „зашто губат време и средства со софтвери, и онака сите со телефон се поврзуваме“ да не заборавиме дека милиони се трошат во развивањето на in-house софтверски платформи за новите возила.
Оваа логика е поткрепена од тоа што, според колегите од Jalopnik, еден од извршните директори на Renault прилично директно одговорил на Apple „Не ни ги напаѓајте системите.“
Со оглед на тоа дека Apple неоддамна беа принудени да исплатат вкупна штета од 96 милиони долари на сите корисници кои несакајќи биле прислушкувани од асистентот Siri, мислам дека можеме да се ставиме сите на местото на овие брендови. Немаат доверба, сакаат да заддржат повеќе податоци, и прилично се согласувам со тоа. И ова го кажувам како корисник и на Apple уреди, и на Apple CarPlay.
