Минатата година дебитираше Alfa Romeo Junior, моментално најмалиот кросовер во понудата на италијанскиот бренд. Иако многу традиционални алфисти го одбија Junior, овој потег се покажа многу исплатлив за Alfa Romeo. Можеби и премногу…
Што сакам да кажам?
Junior е веќе поуспешен од Tonale, другиот компактен SUV на Alfa Romeo. Toa е и покрај тоа што Junior не е на пазарот цела календарска година, а Tonale е со нас веќе од 2022. Во првиот квартал од 2025, Alfa успеа да продаде само 5.000 примероци од Tonale. И покрај тоа, продажните бројки на Alfa се качија дури 20% во првиот квартал, и тоа е скоро исклучиво ради Junior.
Alfa нема туку така да крене раце од Tonale. Според информации пренесени од Carscoops, Alfa Romeo Tonale ќе добие темелен фејслифт кон крајот на 2025 година.
Што се однесува до Junior и неговиот успех, повеќе од половина од сите нови Alfa Romeo модели во четири големи европски држави (Германија, Италија, Шпанија и Франција) се Junior. Конечно можеме да кажеме дека Alfa Romeo ужива во многу успешен деби на нов модел.
Но сепак, не треба да се занемари Tonale. Тоа е моделот со кој Alfa Romeo ја најави својата преродба и модернизација. Од Милано потврдуваат дека Tonale ќе остане дел од понудата, и ќе биде и понатаму еден од клучните модели во понудата на брендот. Не знаеме засега што ќе вклучува фејслифтот, но сигурен сум дека ќе има големи промени.
Друга интересна работа што мора да ја спомнеме тука е тоа што наскоро стига и сосема новиот Stelvio. За жал, Giorgio платформата оди во историјата (т.е старателството оди кај Jeep), но на нејзино место доаѓа STLA Large. Друга поинтересна вест е тоа што Stelvio (а и Giulia, која исто ќе биде базирана на STLA-L) ќе ги заддржи моторите на внатрешно согорување.
Гласините тврдат дека ќе се вгради 3.0 Hurricane бензинецот со шест цилиндри во линија кој моментално го нудат неколку Stellantis модели во САД, како што е RAM 1500 и наскоро Dodge Charger Daytona. Не е исклучена опцијата дека Quadrifoglio верзиите ќе го заддржат 2.9 V6 моторот кој доаѓа од Ferrari.
До 2026 година, понудата на SUV модели на Alfa Romeo ќе биде сосем обновена, и мислам дека наскоро ќе се стабилизира целосно ситуацијата и ќе може да очекуваме и некои поинтересни работи од Alfa Romeo.
