Lamborghini Miura, Lamborghini Countach, Bugatti EB110, Renault Magnum. Што имаат заедничко овие возила? Зад нивните дизајни стоеше истиот човек; легендарниот Марчело Гандини (Marcello Gandini).
На 13 март 2024 година, автомобилскиот свет го загуби легендарниот дизајнер. Во негова чест, да го погледнеме неговиот живот и дел од неговото дизајнерско портфолио.
Првиот дизајнерски проект на Гандини беше легендарната Lamborghini Miura, првиот вистински суперавтомобил со mid-engine дизајн. Откако Miura го отвори танцот, целата автомобилска индустрија едногласно реши дека сите суперавтомобили заслужуваат ваков дизајн.
Гандини стои и зад многу други Lamborghini дизајни, како Diablo (мoeто омилено Lambo) и Espada, помалку познатиот grand touring модел на Lambo со четири седишта.
Гандини имал само 22 години кога го завршил првиот дизајн на Miura. Како што кажа Ричард Хемонд на Top Gear пред многу години,
На тие години колите што ги цртав јас сеуште имаа пушки на нив!
Легендарниот Lancia Stratos, еден од многуте автомобили на италијанскиот бренд кој згази на рели патеките е исто така дизајн на Гандини. Stratos е познат по своето многу, многу мало меѓуоскино растојание, кој го направи поагилен и поспособен. Денес Stratos има многу висока вредност, и ќе се качува и понатаму.
Малиот Fiat X1/9, кој многумина го нарекуваат мини Ferrari, поради mid-engine распоредот, е дизајн на Гандини. Ова е еден од малкуте спортски автомобили од 70те кој можат многумина да си го дозволат. Секако, доколку се спремни за оддржување на стар автомобил.
Директно од рели патеката во 80те, Renault 5 Turbo е дизајн на Гандини. Ова беше еден од многуте модели на рели патеката кој личеше на сериски модел, но го криеше моторот позади. Иако 5 Turbo победи во Монте Карло во 1981, погонот на задните тркала не беше доволен да ја порази конкуренцијата со погон на сите четири.
За крај, би го издвоил Citroen BX, моделот кој го донесе тој познат Citroen дизајн и хидропневматската суспензија во покомпактен автомобил. BX стана еден од најуспешните модели на брендот, со 2.3 милиони произведени примероци.
Ова е само еден мал дел од шареното портфолио на Марчело Гандини. Неговите дела ќе останат запамтени уште долги години во автомобилската индустрија, и за многумина од нас ќе будат добри спомени. Нека му е лесна земјата.
