Десет години од дебито на првата генерација, и после еден куп гласини и информации, конечно дојде време да му посакаме добредојде на новиот Porsche Macan!
Новиот Porsche Macan е целосно електричен
Првата генерација на Porsche Macan го направи своето деби во 2014 година, и оттогаш стана еден од најуспешните модели на германскиот бренд, со повеќе од 800.000 примероци продадени ширум светот од 2014 наваму.
Веќе подолго време знаеме дека втората генерација на Macan ќе биде целосно електрична. Со оглед на тоа дека Taycan е еден од најбараните модели на брендот, ова и не треба да не чуди.
Дизајнот е повеќе еволуција отколку револуција. Се гледа дека сѐ уште станува збор за најмалиот SUV на Porsche, но има и неколку јасни разлики што го разликуваат од претходникот. Многу од дизајнерските елементи црпат инспирација од Taycan, како дизајнот на светлата и предницата.
Општата силуета исто така воведува малку наклонета кровна линија, со цел да се подобри аеродинамиката, а со тоа и опсегот на струја. Задниот дел е доста рамен, и го вклопува најновиот light bar дизајн кој веќе го видовме на новиот Cayenne.
Ајде да позборуваме за важните детали. Новиот Macan е поставен на сосема нова платформа наречена PPE, односно Premium Platform Electric. Ова е првата платформа на Porsche која е изградена на 800V архитектура, што овозможува максимални брзини на полнење на DC полнач од 270 kW.
Првите две изведби кои дебитираат се Macan 4 и Macan Turbo. Macan 4 има максимален износ од 408 коњски сили, додека Macan Turbo има до 639 коњски сили. Стотка кај Macan 4 се случува за 5.2 секунди, а кај Macan Turbo за 3.3 секунди, додека максималните брзини се 220 (Macan 4) или 260 (Macan Turbo) km/h.
Новата архитектура е спарена со нов тип на батерија, која на поспори полначи, преку вграден механизам може да се префрли ефективно на две ќелии од по 400V, за поефикасно полнење. На компатибилен DC полнач, полнење од 10% до 80% се случува за околу 21 минута. Macan 4 има максимален опсег од 613 километри, а Macan Turbo 591 km (WLTP).
Нормално, за да се постигнат такви бројки, Porsche исто така посвети многу внимание на аеродинамиката, и новиот Macan има и пасивна и активна аеродинамика преку Porsche Active Aerodynamics. Сето тоа доведува до коефициент на отпор кон возудхот од само 0.25 Cd.
Ентериерот го воведува новиот дизајн на Porsche, со најновата генерација на инфозабавен систем и дигитална инструмент табла. За разлика од Taycan, Macan ги враќа физичките контроли за клима уредот (благодарам од сѐ срце). За тие што имале искуство со Porsche до сега, ентериерот ќе им биде познат.
Porsche ќе почне со испорака на новиот Macan во втората половина од годината. Засега не се достапни информации околу цените на македонскиот пазар, но знаеме дека во Германија Macan 4 ќе започнува од €84.100, додека Macan Turbo ќе започнува од €114.600.
Kommentare