BMW го претстави X2, како и електричниот iX2

BMW X2 е дел од гамата на германскиот бренд од 2017 година. Неговото позиционирање отсекогаш било поспортска верзија на X1, со помлада таргет демографија. Успехот на X2 не можеме да го негираме, а сега е време за следната генерација. BMW штотуку ја претстави втората генерација X2, која за прв пат добива и iX2 електрична изведба.

Нов купе дизајн за BMW X2

Првото нешто важно за X2 е сосема новиот дизајн. Се држи близу до новиот дизајнерски јазик на BMW, но новиот X2 воведува сосема нов купе дизајн.

Јасно е дека BMW ги истакнува разликите во својата X гама, каде што моделите со непарни броеви се регуларните SUV модели, додека парните броеви наведуваат на поспортските купе модели. Таков е случајот со X6 и X4, и сега X2 се придружува на таа нова филозофија.

X2 M35i испорачува 300 коњски сили до сите четири тркала

Верзијата на X2 со мотор со внатрешно согорување дебитира во појачаната M35i xDrive верзија. Под поклопецот се наоѓа 2.0-литарски турбо четирицилиндрец од најновата генерација на BMW агрегати, со 300 коњски сили и 400 Nm вртежен момент. BMW тврди дека може да постигне 100 км/ч за само 5.4 секунди, и доаѓа со посебно штелување на шасијата директно од M одделот. Сите модели на X2 со бензински и дизелски агрегати доаѓаат стандардно со 7-степен автоматски менувач.

Секако, ќе се нудат и други агрегати, дизелски и бензински, со три и четири цилиндри. Најверојатно изборот на агрегати од X1 ќе се префрли и во понудата за X2. Сите агрегати во X2 доаѓаат и со 48V лајт-хибрид технологија.

Поважната вест кај новиот BMW X2 е iX2 електричната изведба.

Првата верзија која ќе се нуди е xDrive30, со два електромотори и погон на сите четири тркала, придвижени од батериска кутија со 64.8 kWh нето капацитет.

Вкупниот системски износ е 313 коњски сили и 494 Nm, што овозможува забрзување до стотка за 5.6 секунди, додека максималната автономија според WLTP е од 417 до 449 километри. Најверојатно е дека подоцна ќе следат и верзии на iX2 со само еден електромотор.

Нов ентериер и подобрена технологија

Како што би очекувале, има големи промени и во ентериерот на новиот X2. Целиот ентериер на X1 доаѓа во X2 топтан, вклучувајќи го нископрофилниот селектор за менувачот, дигиталната инструмент табла и инфозабавниот систем со најновата генерација на BMW iDrive.

Стандардна безбедносна опрема вклучува темпомат со функција за кочење, асистенција при возење наназад и асистенција при паркирање, како и предупредување за преден судар. Достапни се и еден куп опции, меѓу кои и BMW Drive Recorder, или лаички кажано dashcam, како и Remote Theft Recorder доколку се сомневате дека некој пробува да ви го украде возилото.