Audi Q6 e-tron е најновиот член на e-tron семејството

Audi почна сериозно да ја сфаќа работата со електрични возила пред неколку години со претставувањето на e-tron, кој е сега познат како Q8 e-tron. Потоа дојдоа драматичниот e-tron GT и сестраниот Q4 e-tron базиран на MEB платформата.

Сега е време да му кажеме добредојде на најновиот член.

Ова е новиот Audi Q6 e-tron

Q6 e-tron е најновиот член на e-tron семејството, со местоположба меѓу Q4 и Q8 во гамата. Како што можеби наведува името, моделите со парен број ќе бидат целосно електрични, додека тие со непарен број ќе користат мотори на внатрешно согорување, барем додека тоа е сѐуште дозволено.

Од надвор, Q6 e-tron е Audi без сомнеж, со познатата предна маска и заден light bar, но дизајнот на стаклените елементи е малку поразличен, и напред забележуваме нешто досега невидено за Audi: превртени предни светла, со дневните над соборените. Light bar-от на задниот дел е со OLED технологија, со 360 сегменти кои можат да го менуваат приказот на секои 10 милисекунди.

Освен тоа, предните светла вклучуваат активен светлосен потпис, за прв пат во Audi модел.

Со должина од 4.7 метри и ширина од 2.1 метри (вклучувајќи ги ретровизорите), Q6 e-tron е цврсто во mid-size класата. Меѓуоскиното растојание е скоро 2.9 метри, а тоа е добро за просторот во внатрешноста

Q6 e-tron е поставен на PPE платформата

Новиот Q6 e-tron е првиот модел на Audi поставен на PPE (Premium Platform Electric) платформата, развиена во соработка со Porsche. Истата платформа ја формира и подлогата за новиот електричен Macan.

Тоа овозможува, меѓу другото, архитектура со 800 волти. Основниот Q6 e-tron користи 94.9 kWh (нето) батерија и испорачува 388 коњски сили, додека SQ6 e-tron има огромни 517 КС. Стотка на Q6 e-tron се случува за 5.9 секунди, додека на SQ6 му се потребни само 4.3 секунди.

Поради новата архитектура, Q6 e-tron може да се наполни од 10% до 80% за само 21 минута, а може да се додадат дури 254 километри опсег за само 10 минути, секако на соодветен полнач. Опсегот на струја според WLTP изнесува 625 километри, што е навистина импресивна бројка.

Ентериерот на Q6 e-tron воведува сосем нов дизајн. За жал, физичките контроли за клима уредот веќе ги нема, но на нивно место доаѓа трио од екрани, меѓу кои и еден за совозачот. Сите се поддржани од новата E3 електронска платформа.

Системите му овозможуваат на возачот да остане конектиран, а екранот за совозачот има режим за приватност за да не му го одвлекува вниманието на возачот. Има нов дигитален асистент кој постојано учи, како и AR heads-up display (со засилена реалност или аугментирана реалност). Тоа значи дека сите информации на heads-up дисплејот изгледаат како да се проектирани многу понапред.

Како што би очекувале, има еден куп безбедносни системи. Адаптивен темпомат, ограничувач на брзината според препознати сообраќајни знаци, асистенција при нагло вртење, систем за мониторирање замор кај возачот и многу други, и сите се стандардни!

Audi Q6 e-tron ќе пристигне во втората половина од 2024 година. Засега нема информации околу цените за нашиот пазар.